មានប្រសាសន៍នៅក្នុងពិធីហ្វឹកហ្វឺនកងកម្លាំងសមត្ថកិច្ចទាំងបីស្ថាប័ន នៅក្នុងខេត្តប៉ៃលិននាព្រឹកថ្ងៃពុធ ១០កើត ខែកក្តិក ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី០៦ ខែវិច្ឆិកា ឆ្នាំ២០១៩ នៅបរិវេណសាលាខេត្តប៉ៃលិន, ដោយមានការអញ្ជើញចូលរួមពីសំណាក់ឯកឧត្តម ផាន់ ចាន់ធុល អភិបាលខេត្តប៉ៃលិន និងនាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិ, ឯកឧត្តម សក់ សេដ្ឋា រដ្ឋលេខាក្រសួងមហាផ្ទៃ បានមានប្រសាសន៍ថា៖ កងកម្លាំងប្រដាប់អវុធទាំង ៣ស្ថាប័ន បានត្រៀមខ្លួនរួចរាល់ ក្នុងការបង្ក្រាបទប់ស្កាត់ក្រុមជនក្បត់ជាតិ សម រង្សី និងបក្សពួក ដែលចង់បង្ករអសន្តិសុខ បំផ្លាញសន្តិភាពនៅកម្ពុជា តាមរយៈផែនការផ្តួលរំលំរាជរដ្ឋាភិបាលស្របច្បាប់ ដែលកើតចេញពីការបោះឆ្នោត ក៏ដូចជាការត្រៀមខ្លួនជាស្រេច ដើម្បីការពារ ជាតិ សាសនា ព្រះមហាក្សត្រ មិនអោយជនណាមកជាន់ឈ្លី ជេប្រមាថបាននោះឡើយ។ ឯកឧត្តមបានមានប្រសាសន៍បន្តថា៖ ការប្តេជ្ញាចិត្តខ្ពស់របស់កងកម្លាំងទាំងអស់ ពិតជាមានតម្លៃ មិនអាចកាត់ថ្លៃបាន ក្នុងការការពារបូរណភាពទឹកដី និងសុខសន្តិភាព ស្ថេរភាពនយោបាយ ជូនប្រទេសជាតិ និងប្រជាជនដែលកំពុងរស់នៅក្នុងដំបូលសុខសន្តិភាព ក្រោមការដឹកនាំរបស់រាជរដ្ឋាភិបាល តាមលទ្ធិប្រជាធិបតេយ្យ ដែលមានសម្តេចតេជោ ហ៊ុន សែន ជាប្រមុខ។
សូមបញ្ជាក់ថា៖ បើតាមរបាយការរបស់ឯកឧត្តម ផាន់ ចាន់ធុល អភិបាលខេត្តប៉ៃលិនបានអោយដឹងថា កងកម្លាំងសមត្ថកិច្ចទាំងបីស្ថាប័ននៅក្នុងខេត្តប៉ៃលិន ដែលត្រូវចូលរួមហ្វឹកហ្វឺននេះរួមមាន៖ កងនគរបាលជាតិ កងរាជអាវុធហត្ថ និងទាហ៊ាន សរុប៥៥០នាក់ ដែលកងកំលាំងទាំងអស់នឹងត្រូវចល័តតាមដងផ្លូវជាតិលេខ ៥៧ ឆ្ពោះទៅកាន់ច្រកព្រំដែន និងតាមផ្លូវសំខាន់មួយចំនួនទៀតនៅក្នុងខេត្តប៉ៃលិនផងដែរ៕ ពិនិត្យ កែសម្រួល៖ វួច ពឿន
