ប៉ៃលិន៖ មានប្រសាសន៍ក្នុងឱកាសអញ្ជើញចុះពិនិត្យមើលការរៀបចំសាងសង់ផ្សារថ្មី (ផ្សារសាមគ្គី ហៅផ្សារប៉ាហ៊ី) ផ្នែកខាងលើ ស្ថិតក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ខេត្តប៉ៃលិន នាថ្ងៃទី២៧ ខែមេសា ឆ្នាំ២០២០ ឯកឧត្តម ផាន់ ចាន់ធុល អភិបាលខេត្តប៉ៃលិន បានស្នើដល់គណៈកម្មការផ្សារ និងអាជីវករ ព្រមទាំងអាជ្ញាធរពាក់ព័ន្ធ ត្រូវសហការគ្នា ធ្វើយ៉ាងណាសាងសង់ផ្សារថ្មីឱ្យបានឆាប់រហ័ស ដើម្បីឆាប់បានដំណើរការលក់ដូរ និងធ្វើអាជីវកម្មឡើងវិញ។
ឯកឧត្តម ផាន់ ចាន់ធុល បានមានប្រសាសន៍លើកឡើងថា៖ ផ្សារសាមគ្គី ហៅផ្សារប៉ាហ៊ី នេះ គឺបានសាងសង់ឡើងចាប់ពីក្រោយសមាហរណកម្មមកម្លេះ ដោយធ្វើពីឈើប្រក់សង័្កសី ដោយមានផ្នែកខាងលើ និងផ្នែកខាងក្រោម ហើយបច្ចុប្បន្នផ្នែកខាងក្រោម ត្រូវបានគណៈកម្មការផ្សារ ធ្វើការសាងសង់ថ្មីឡើងវិញរួចរាល់ឱ្យបងប្អូនអាជីវករចូលលក់ដូរ និងធ្វើអាជីវកម្មជាធម្មតា គឺនៅសល់តែផ្នែកខាងលើ គឺមានសភាពទ្រុឌទ្រោម ហើយពេលថ្មីៗនេះ បានរងការខូចខាតដោយសារខ្យល់កន្ត្រាក់ទៀត ដូច្នេះរដ្ឋបាលខេត្ត បានសម្របសម្រួល និងសហការ ជាមួយគណៈកម្មការផ្សារ និងអាជីវករ ដើម្បីធ្វើការសាងសង់ផ្សារនេះឡើងវិញ។
ឯកឧត្តមអភិបាលខេត្ត បានមានប្រសាសន៍ស្នើដល់មន្ត្រីជំនាញ ត្រូវសហការជាមួយគណៈកម្មការផ្សារ និងធ្វើការសិក្សាគម្រោងសាងសង់ឱ្យបានច្បាស់លាស់ទៅតាមស្តង់ដា ដោយត្រូវធ្វើប្រព័ន្ធលូបង្ហូរទឹក និងបរិវេណងាយស្រួលរថយន្តបើកចូលបានស្រួល ពេលមានគ្រោះអគ្គិភ័យកើតឡើង ក្នុងនោះដែរក៍ត្រូវធ្វើបង្គន់អនាម័យ ធ្វើអាងស្តុកសំរាម មានកន្លែងចតយាន្តយន្ត ឱ្យបានសមស្រប និងមានសណ្តាប់ធ្នាប់ល្អ។
សូមបញ្ជាក់ថា៖ ផ្សារដែលចាប់ផ្តើមសាងសង់ថ្មីនេះ មានបណ្តោយ ៦៣ម៉ែត្រ និងទទឹង៨ម៉ែត្រ ដែលធ្វើពីដែក ប្រក់ដំបូលសង័្កសី ដោយប្រើពេលសាងសង់រយៈពេល ២ខែ។ ញ៉ឹប បូរី ប៉ៃលិន
